《耶穌言行錄》

Tē-33-chiuⁿ,Îu-gôan tī soaⁿ-téng kóng tō-lí

作者 Ko Kim-seng.

listen

（Má-thài 6：5-18）.
Îa-so͘ koh chiong kî-tó ê tāi-chì kà-sī lán，kóng lán m̄-thang chin-chhīuⁿ ké-hó ê lâng，hoaⁿ-hí khīa kong-hêng ê só͘-chāi；ti̍oh ji̍p ba̍t-pâng koaiⁿ-mn̂g，kîu- lâng khòaⁿ bōe ti̍oh ê Pē，i̍ah m̄-thang chin-chhīuⁿ pài-pu̍t ê lâng ta̍uh-ta̍uh līam，in-ūi lán só͘ khìam-ēng，bē kîu ê tāi-seng，Thiⁿ-pē í-keng chai.Îa-so͘ chīu kà-sī in kî-tó，kóng，"Lín kî-tó ti̍oh kóng，Góan tī thiⁿ-nih ê Pē，Gōan Lí ê mîa sèng.Lí ê kok lîm-kàu.Lí ê chí-ì tit chîaⁿ，tī tōe-nih chin-chhīuⁿ tī thiⁿ-nih.Góan ê ji̍t-si̍t，kin-á-ji̍t hō͘ góan.Sìa-bían góan ê ko͘-hū，chhin-chhīuⁿ góan i̍ah ū sìa-bían ko͘-hū góan ê lâng.Bo̍h-tit chhōa góan ji̍p tī chhì，ti̍oh kìu góan thoat-lī hit ê pháiⁿ ê.In-ūi kok，kôan-lêng，êng-kngg lóng sī Lí só͘ ū，tāi-tāi bô chīn.À-bēng. "Khòaⁿ chit kúi kù kî-tó ê ōe，ū kúi-nā hāng put-chí ìau-kín ê kà-sī.Thâu-chi̍t hāng，Sīong-tè m̄-nā cho-seng pó-íuⁿ lán，i̍ah ū hō͘ Ki-tok si̍ok-hôe lán，koh hoaⁿ-hí ēng Sèng Sîn têng-thâu-siⁿ lán，lán sîong-sîong ti̍oh sìau-līam chit hō ê tō-lí，jīn Sīong-tè chòe Pē；ēng kíaⁿ ê sim lâi chhin-kūn I.Tē-jī，Sī lán ti̍oh kèng-tīong I ê mîa，i̍ah kîu I hō͘ sè-kan lóng-chóng ê lâng ōe chai I sī chì-sèng，lâi kui tī I.Tē-saⁿ，Sī kîu Sīong-tè hō͘ lán kap lóng-chóng ê lâng hoaⁿ-hí hâng-ho̍k I ê kóan-hat，chòe I ê peh-sìⁿ.Tē-sì，Sīong-tè ê chí-ì tī thiⁿ-nih，lóng-chóng chun-thàn，bô ûi-ke̍h；ti̍oh kîu I hō͘ lán kap tōe-bīn-chīuⁿ lóng-chóng ê lâng i̍ah ōe án-ni.Tē-gō͘，Thang chai lán ji̍ok-sin ū ha̍p-gî ê khìam-ēng，i̍ah thang tùi Sīong-tè kîu；chóng-sī m̄-thang kè-thâu khòa-lū，i̍ah m̄-thang it-bī sīuⁿ ài beh lîam-piⁿ tit-ti̍oh hè-mi̍h put-chí chōe，chek-chū chòe kú-tn̂g ê lō͘-ēng，Ta̍k-ji̍t sī kîu ta̍k-ji̍t só͘ ti̍oh ēng ê chīu hó；án-ni sī hían-bêng ti-chiok ê sim，i̍ah Sīong-tè bô m̄ síuⁿ-sù lán.Tē-la̍k Ti̍oh sòe-jī sīuⁿ ka-kī ū sìa-bían lâng ê sim á bô；ti̍oh kîu Sīong-tè síuⁿ-sù lán chit hō ê sim，chiah thang ǹg-bāng ka-kī ê chōe-kòa ōe tit-ti̍oh Thiⁿ-pē ê sìa-bían.Lán kî-tó ê sî ti̍oh kí-tit ka-kī sī tāng-chōe ê lâng，só͘-í ti̍oh sêng-si̍t jīn-chōe kîu sìa-bían.Tē-chhit，Sè-kan sī chhì-līan ê só͘-chāi，chin-chōe pháiⁿ-tāi ōe ín-íu lán hām-lo̍h chōe；koh lán ka-kī put-chí lóan-ji̍ok，bô khùi-la̍t ōe khah-îaⁿ pháiⁿ；só͘-í ti̍oh kîu Thiⁿ-pē chín-kìu，chiah ōe bían-tit gûi-híam.Sèng-chheh kóng，"Lín kan-lân ê ji̍t kîu góa，góa tek-khak kìu lín.

"Lō͘-bé kúi kù sī hō͘ lán chai lán só͘ tùi kî-tó ê，si7u7 kôan-lêng ê Sīong-tè；só͘-í ti̍oh sìn，ti̍oh óa-khò；in-ūi I ōe chîaⁿ bān-hāng ê tāi-chì.Kî-tó ê sî ìau-kín só͘ kóng ê ōe m̄-thang kap sim bô tâng；siat-sú án-ni，chīu bōe-tit-thang kóng，"À-bēng，"á-sī"Sim chèng só͘ gōan；"i̍ah Thiⁿ-pē m̄ ún-chún；só͘-í ti̍oh ēng sêng-si̍t ê sim，chīu só͘ kîu ê ōe tit-ti̍oh.À-bēng ê ì-sù sī sêng-si̍t，sī chí lán kî-tó ti̍oh ēng sêng-si̍t，in-ūi Sīong-tè sī chin-si̍t，kóng-chhut chīu kîaⁿ.

Îa-so͘ i̍ah kà-sī lán kìm-chi̍ah ê tō-lí.Kìm-chi̍ah ê ì-sù sī in-ūi iu-būn jīn-chōe tī Sīong-tè r5 bīn-chêng；só͘-í m̄-thang chin-chhīuⁿ ké hó ê lâng，tài iu-îong，pìⁿ bīn-sek，ēng kìm-chi̍ah beh hō͘ lâng o-ló lán chòe khîan-seng.Îa-so͘ kóng，"Kìm-chi̍ah ê sî thâu-mn̂g ti̍oh boah îu，bīn ti̍oh sóe，bo̍h-tit ēng kìm-chi̍ah hō͘ lâng khòaⁿ，chīu ōe tit-ti̍oh Thiⁿ-pē ê síuⁿ. "

思羅安台語點字網站