《台語荒漠甘泉（全羅版）》

"Khùn-khó͘ thòan-līan"

作者 陳清俊 翻譯

listen


Cha̍p-it ge̍h jī-saⁿ (Cha̍p-it ge̍h jī-cha̍p-saⁿ ji̍t)
"Lí hō͘ lí ê peh-sìⁿ tú-ti̍oh kan-lân." (Si-phian 60:3)

Chin hoaⁿ-hí si-jîn tùi Sīong-tè kóng, jîn-seng ū khùn-khó͘, ū kan-lân. Bô m̄-ti̍oh, seng-o̍ah ū kan-lân ê sū.

Jo̍ah-thiⁿ pêng-íu sàng góa chi̍t chhok hún-âng-sek ê hoe, góa chiap ti̍oh ê sî mn̄g kóng, "Che sī sím-mi̍h hoe?" Pêng-íu hôe kóng, sī "gân-chi̍oh-hoe, in siⁿ tī chi̍oh-thâu téng, bô síaⁿ thô͘ ê só͘-chāi, īa chí-ū tī hia chiah ōe khui hoe." Góa sīuⁿ ti̍oh seng-o̍ah tī khùn-khó͘ kan-lân tiong Sīong-tè ê hoe, góa kám-kak Sīong-tè tùi I ê "gân-chi̍oh-hoe" ū te̍k-pi̍at ê koan-hôai kap thìaⁿ-sioh, sī kî-thaⁿ ê hoe chhin-chhīuⁿ "pek-ha̍p-hoe" á-sī "mûi-kùi-hoe" só͘ bōe thang tit-ti̍oh ê. --- Margaret Bottome

Jîn-seng ê khó-gīam sī beh chō-chīu lán, m̄-sī beh phò-hōai lán. Keng-chè khùn-lân ū khó-lêng húi-bi̍at i ê seng-lí sū-gi̍ap, chóng-sī thang chō chhut i ê sèng-keh. Gōa-chāi sī sīu táⁿ-kek, lōe-chāi khiok tit lī-ek. Só͘-í Sīong-tè îong-ún lán seng-o̍ah tú-ti̍oh khùn-khó͘, lán thang khéng-tēng, chin-chìaⁿ ê gûi-híam kap khùn-lân, tngg lán tô-phiah kap hóan-khòng, án-ni hō͘ lán sit-khì chiok-hok. --- Maltbie D. Babcock

Eng-hîong sī tī ji̍at-ji̍at ê thih-tiam khó͘-līan tûi chhut-lâi,
Chhàn-lān ê íong-khì sī tùi chhì-līan pôe-íuⁿ khīa-chāi.
Ū-ê sìⁿ-mīa sêng-se̍k, ū-ê sìⁿ-mīa khui-hoe chûn-chāi,
Chí-ū tī bak-ti̍oh huih ê thô͘ sīong chai
Kàu sí líau āu, ōe chèng-bêng in ê úi-tāi.

Sīong-tè tī sīu-khó͘ ê soaⁿ-téng chhē I sīong cheng-eng ê peng.


附註:《荒漠甘泉》漢羅版kap "Hong-bô͘Kam-chôaⁿ"全羅版附CD，由人光出版社出版，歡迎洽購(06-235-6277分機(122~124) ， e-mail:book@pctpress.com