《古典台語文學e5欣賞》

| | | 轉寄

十字架ê記號 (1) 救主誕Hit暝

阿爸,阿娘,緊備辦o͘h!拜堂ê大鐘teh tân lah nē!

惠美ê心真歡喜;因為今暝是救主誕,伊kah兄哥青雲á,自幾若點鐘前,就換衫褲備辦好,beh去赴。因為兩兄妹是真活動,伊本身今年是18歲,生做súi koh乖,伶俐koh gâu讀冊。今年是南京省立ê高等女學校四年,ta̍k年頭名,也兄哥今年20歲,tī南京ê省立商科大學三年(liân);二個lóng是koh無jōa久beh卒業。也tī chit-ê歇年,tńg來chhōe父母。是tiàm tī離南京入東十phò͘ ê山腳,一個鄉庄,叫做士隆庄。

Chit-ê庄名真好聽,就是庄雖bóng無jōa大;Iáu-kú前清時代,tī hit庄裡有出kúi-nā個舉人、秀才也bōe少,所以是相當有文化ê庄社。人口2,000連。也有一條街á teh買賣:山內出入ê人真chē,所以雖bóng是講山腳ê田庄所在;m̄-kú也是相當ê鬧熱。

惠美in老父卻是相當會得過ê人,前阿公bat中舉,老父也是老秀才,財產ùi老父少年ê時嫖、睹、飲,三款全(chn̂g);koh愛食鴉片,所以早猶原有開kóa。現時所chhun卻是三、兩擔錢。老父tī 30 gōa歲ê時,有染tio̍h重病險死,hit時有來南京hō͘基督教開ê醫館醫治,對hit時得tio̍h道理。Hit-tia̍p兄哥青雲四歲,也伊本身iá未出世。對hit-tia̍p了後老父真熱心信主,隔二年chiah生惠美ah。中國人是重男輕女,總是老父為siàu念主ê疼,救伊出死入活koh改鴉片kah一概pháiⁿ-tāi;所以伊chiah號伊做惠美,來siàu念上帝恩惠ê美。對hit霎了後lóng無koh生。Án-ni就對kiáⁿ疼命命。Tùi信主了後,就熱心tī教會,所以受揀做長老,連任chē-chē年。到今年50外歲,iáu-kú teh做長老;所以地方ê人若講林長老無一個m̄知伊是熱心ê基督徒。也伊無經營seng-lí;是將伊所有ê田hhiaN3工來作;所以極有時間thang培養兩個kiáⁿ兒。對細漢hō͘ in入基督教ê學校,直直培養到卒業,thang講是真順序,真滿足,兩老常將chit二個kiáⁿ來歡喜。

也今年是tī庄腳ê教會,beh做祝聖誕式,兩兄妹有寄附。阿兄violin相當會挨,惠美ah piano也相當會彈koh聲真好;所以二個phut-phut跳真愛去赴開會;m̄-kú阿娘kah阿爸lóng老人,暗時行路愛踏探,所以伊tio̍h等in牽,koh無jōa久就去,tùi頭到尾真心適tò來。中間一齣不止深刻tī青雲ê腦內;就是seng-lí人chhōe真珠(是耶穌ê譬如)做起真出神。Tùi這時有喚起伊一項趣味;就是想伊大學卒業後,也伊想beh來去外國做親像hit款seng-lí。看了tò去有將chit-ê所感講hō͘ in老父聽。也老父聽了恬恬,老母直直嫌,講做hit號seng-lí tio̍h去外國奔(phun)走,伊khah無愛。婦人人ê款lóng是án-ni,伊愛伊tiàm本所在開行á是kah人tiàm。來食會社、公司ê頭路。總是小妹惠美真贊成兄哥ê說,講青年人應該tio̍h án-ni活動,所以兩兄妹就有話講。了後koh無jōa久,就大家koh入學。chia且按下。

兩老,kiáⁿ lóng去入學,內面真無伴to̍h雞鳥飼chē,無閑就想講tio̍h來chōe一個tú好ê新婦。兩老就參詳,大家同意ài做本教會牧師ê cha-bó͘-kiáⁿ。牧師ê cha-bó͘-kiáⁿ今年kah惠美同學(tâng-o̍h),平chē歲,siāng年級,平平明年四月會卒業,號做王雪梅,生做也是真好,kah惠美是至好ê朋友;所以兩老參詳了,就央人去對牧師講,牧師也是真歡喜,因為是本堂熱心長老ê後生。少年人也是好品行koh真有志氣,所以對嘴允伊。就hō͘兩個少年知,二比也是真歡喜。對án-ni。青雲常常寫phoe hō͘雪梅。雪也常常寫phoe hō͘青雲。兩個真正情投意合,saⁿ疼m̄-ài分開。時日真快過,liâm-piⁿ四月,就大家卒業。照青雲ê老父是ài liâm-piⁿ kā in娶,王牧師in hit-pêng也是真歡喜。總是青雲ê意思m̄-ài hiah緊,伊是ài將伊所趁ê錢來chhōa khah有心適。所以真深意對老父求,准伊出外來做seng-lí,óa半年後chiah tò來娶。伊ê老父本m̄,總是為tio̍h伊迫切就准伊。伊ê所愛就是照前所講,愛去外國做寶貝貴重品ê走水seng-lí;所以就去買一隻馬也加入外國ê隊商,chit-pang是beh去印度。hia也是平時伊至欣慕愛去ê位,所以真歡喜家己就kah朋友大家會合tī五月初beh tùi南京出發。大家beh用牽馬過山,沿路對歸化ê生番山內ê人買chiah-ê cheng-siⁿ野獸ê皮親像鹿皮、豹皮,á是鹿茸、象牙ê類。所以tī 4月29,就tùi本所在出發。