《疼你e5厝邊》

| | | 轉寄

被上帝開光點眼ê盲人調音師─邱瑞淵

「有時chūn我lóng會想,如果當時我無信上帝neh?Án-ne現在我teh做什麼?是m̄是就一世人做童乩去loh?」邱瑞淵tī開始挨(e)小提琴chìn前,微微á笑講chiah-ê話。 今年五十六歲ê邱瑞淵,是台南德光教會ê會友,也是佑明福利協進會ê理事,舊年tú當選台南市模範父親。特別ê是,伊iáu是全台第一個盲人鋼琴調音師,音感非常精準。有趣味ê是,chit位調音師,當年差一點á á就成做童乩,人生因為遇tio̍h上帝續來了一個大轉彎。

出身tī童乩世家ê邱瑞淵,tùi阿公hit一代起,就tī嘉義縣布袋鎮開始做童乩。一代傳一代,到邱瑞淵chit一輩,已經是第三代,出生ê時to̍h是雙眼失明ê邱瑞淵,因為chit-ê先天ê缺陷,厝裡ê人kā伊送hō͘阿公侍奉ê池府千帥做義kiáⁿ,一方面祈求神明ê保佑,另外一方面,也希望chit-ê gín-á長大後ē-tàng繼承阿公ê衣缽,成做一個童乩。到了五歲hit年,年紀iáu小ê邱瑞淵,就tī懵懵懂懂之間,由父親代替kap神明咒重chōa,若是日後無做一個童乩,違背了kap神明之間所立ê誓言,伊也將絕子絕孫,斷根無後。 因此,tùi五歲hit年起,邱瑞淵就開始慢慢接受「童乩教育」,除了學習做桌頭(亦to̍h是童乩ê翻譯官,當童乩起童ê時,tī邊á為眾人解說神明語言ê人),也兼學收驚、算命,一切lóng為tio̍h做一個童乩做準備。到十二歲hit年,學得差不多了後,該背ê mā lóng背起來lah,無想tio̍h,chit-ê時chūn卻來了一個意外ê人。

某一工,厝門口出現了一個未bat見面ê女性,講想beh見邱瑞淵,並且希望ē-tàng帶伊去學校讀冊,伊是台中惠明盲校ê陳淑靜校長。 Hit時邱瑞淵全家已經搬到屏東tòa loh,對tī chit-ê遠道來ê生份人,厝裡ê人除了感覺奇怪之外,對tī chit位盲校校長提出ê請求,koh-khah是無法度接受。Tī hit-ê封閉ê年代裡,厝裡ê人感覺,既然目睭看bē-tio̍h,為什麼iáu beh去學校neh?另外一方面,也感覺邱瑞淵to已經十二歲lah,也該準備ài幫忙家計,為清苦ê厝境貼補一kóa工作酬勞;koh加上惠明盲校是教會學校,厝裡ê人直覺這kap童乩ê身分互相無符合,因此拒絕了陳校長。

但陳校長卻mî-nōa m̄放棄,一再登門拜訪,連續來了三pái;到第三pái ê時,照常iáu是被拒絕。不過,陳校長卻從來m̄-bat灰心,chit-pái伊換一個方式,當大家ê面前,伊kā邱瑞淵ê父親講:「Án-ne pah,咱大人mài替gín-á做決定,hō͘伊家己做決定,如果伊講伊boài去讀冊,án-ne就mài,但是如果伊講伊beh去讀冊,án-ne你也無條件拒絕我帶伊去讀冊。」

原來滿心認為邱瑞淵bē答應ê父親,一嘴講好。結果,無想tio̍h十二歲ê邱瑞淵,卻kā大家講,伊beh去學校讀冊!將án-ne,邱爸爸也啞口無言,只好hō͘邱瑞淵跟tòe陳校長去學校讀冊。問邱瑞淵為什麼想beh去學校讀冊?伊笑出來,講:「其實是因為當時kap我仝款大ê小朋友,in去上小學了後lóng會講華語lah,用華語罵我我lóng聽m̄-bat。所以我chiah想beh去學校讀冊,學了華語了後就thang kap人相罵。」這其實也是當年盲童ê普遍境遇,因為無受重視,lóng受冷落,致使真oh得入學接受正常教育;á一般ê家長,tī當時風氣保守ê時代,若是家內底有一個殘障gín-á,也真容易無自覺感覺見笑,感覺bē看kháu得,盡可能避人耳目。邱瑞淵講,hit時chūn厝內若有人客來訪,伊就tio̍h bih起來,或是溜去外頭sńg。

十二歲ê邱瑞淵,因此開始了學校讀冊ê旅程,當別人tī chit-ê年紀lóng上了初中ê時,伊chiah tú-beh上小學。但是,無想tio̍h ê是,這一下上,也因此展開真正ê啟蒙教育──邱瑞淵學會曉讀書識字,另外一方面,上帝也為伊phah開了心眼。

Tī惠明盲校求學ê期間,邱瑞淵並m̄是一開始就接受福音,因為伊感覺家己已經hō͘阿公ê神明做義kiáⁿ lah,怎樣ē-tàng接受福音?一直到伊小學六年級hit年,伊chiah終於下定決心,接受耶穌基督成做伊ê救主。

之所以會án-ne下定決心,邱瑞淵講,tī he chìn前ê一段時間,伊一直聽tio̍h一個聲音tī內心迴旋,kā伊講:「你假使beh得tio̍h真正ê喜樂,你來親近我。」連伊家己lóng有kóa bē了解。後來,當伊終於決定要接受福音,鼓起勇氣去kā學校ê校牧講:

「Chit-pái ê受洗,我想beh參加。」當講完chit句話ê hit一刻,伊心中ê一塊大石頭竟然完全kā伊放落地,伊也因此感受tio̍h,chìn前心內底聽tio̍h ê hit-ê「喜樂」,原來就是án-ne ê tāi-chì。

但奇妙ê tāi-chì iáu teh後頭。

當時決心beh受洗ê邱瑞淵,並無phah算馬上kā厝裡ê人講chit件事,因為擔心厝裡ê人可能會反對或有意見。Hit年ê復活節,同時也是邱瑞淵受洗ê hit一工;就tī hit工ê透早,童乩阿公匆匆pōng-pōng tùi嘉義坐車專程趕到屏東,一到屏東厝裡,阿公竟然就開始起童,厝裡ê香爐也莫名奇妙「發爐」lah,內底插ê香lóng無預告to̍h燒起來,火舌焰焰,tī民間信仰裡,chit種情形通常意思講是:厝裡有tāi-chì beh發生loh。

Hit工早起ê六點到七點中間,tī台中ê邱瑞淵,tú beh領受洗禮;tī屏東ê童乩阿公,to̍h已經起童,全身tiô跳bē停,嘴裡不斷teh-hoah「害了了、害了了、一切lóng害了了a-lah!」邱瑞淵ê父親看tio̍h chit款情形,禁bē-tiâu問伊,究竟是什麼tāi-chì「害了了」。童乩阿公講:「Tùi今á日起,我koh phah無去一個kiáⁿ兒lah!」邱爸爸一問,chiah知影原來神明指ê就是邱瑞淵。

幽默ê邱爸爸,忍bē-tiâu繼續問落去:「你本身是一個神明,phah-m̄見一個kiáⁿ兒,kám講bē-sái kā伊chhōe tńg來oh?」童乩阿公竟然回答講:「講sńg笑!he是beh怎樣chhōe tńg來ah!即使是咱五王眾神聯合起來,也無辦法kā伊chhōe tńg來。」邱爸爸繼續追問落去:「是因為咱瑞淵真pháiⁿ mah?」童乩阿公真無奈何回答:「無ah!he m̄是pháiⁿ lah,lín lóng m̄知影oh,伊今á日早起六點ê時chūn,伊ê面上就有一個特別ê記號,hit-ê記號oh,咱眾神lóng無人敢去kā伊蓋掉,無人敢去侵犯tio̍h伊。」

就án-ne,邱瑞淵成了上帝ê kiáⁿ兒。

Hit年暑假放假回家ê時,邱爸爸親嘴問伊是m̄是已經受洗,邱瑞淵大驚,厝裡ê人怎樣已經知影,邱爸爸chiah kā伊講童乩阿公ê事,也hō͘原來擔心m̄知如何開嘴ê邱瑞淵,頓時間食了一粒定心丸。

Koh-khah奇妙ê是,邱瑞淵向父親提起,希望邀請牧師來厝內做一pái家庭禮拜,父親也同意了。就tī進行家庭禮拜ê前夜,童乩阿公koh再現身,來到邱瑞淵屏東厝內。Chit回阿公講,beh tī厝裡做家庭禮拜ē-tàng,但是伊有兩個請求,第一個是mài tī厝裡吟聖詩,第二個是拜託牧師mài tī厝裡祈禱。邱瑞淵問阿公為什麼,阿公講:「Ah我hō͘ lín吟詩吟到底、hō͘ lín祈禱到底,á我ê眾神就行了了lah!」

因為án-ne,邱瑞淵終於篤定地相信,伊所認識ê上帝,是萬王之王,萬主之主,也因此tī信仰上完全確立落來,無koh有絲毫ê擔憂giâu疑。

若án-ne,當年hit-ê五歲時chūn所立ê「毒誓」neh?下文又koh是如何?

後來,邱瑞淵tī惠明盲校完成了初中教育後,心眼因此被phah開了,學會曉讀書識字,也giú得一手優美ê小提琴,而且渴望繼續升學,所以又koh前往台北ê淡江中學就讀高中部,完成高中學業了後,投考台南神學院神學系。Tī台南神學院,伊tú-tio̍h伊ê終身伴侶。 當伊tùi神學系畢業、被派到台南北門嶼教會牧會ê時,一工邱媽媽手the̍h麻油tùi屏東來看伊,見tio̍h了kiáⁿ兒,偷偷á問新婚媳婦ê近況:「Á有無聽講lín教師娘beh生無?」邱瑞淵講有a,已經懷孕loh。這chiah想起來,當年五歲hit時bat立ê絕子絕孫重chōa,也是邱媽媽所擔心ê tāi-chì,無想tio̍h,chiah-ê咒詛(chó͘)早就已經卸除,長女平安出世。

對邱瑞淵來講,因為信靠上帝,一切lóng無koh有所驚惶。邱瑞淵提起,hit時伊kap太太tú搬到台南tòa ê時chūn,也bat租過一間厝,當in確定beh搬到hit位tòa ê時chūn,厝邊阿婆好心kā in講,hit間厝bat有人吊tāu自殺過,chìn前來tòa過ê人也tú-tio̍h過奇怪ê tāi-chì,總是無法度tòa久,因此勸in三思,考慮清楚是m̄是beh搬入去tòa。但邱瑞淵感覺,身為基督徒,有上帝ē-tàng倚靠,無什麼thang驚惶ê。邱瑞淵一家人就tī-hia tòa了兩年,小女兒也tī-hia出生,健健康康成長。M̄-nā hō͘厝邊頭尾看做奇怪,也因此做了美善ê見證,活出基督徒ê貌樣。

回想起chiah-ê歷程,邱瑞淵感覺,這也是做童乩kap做基督徒無仝款ê所在。做一個童乩,必須受限制tī頭殼頂ê小神或邪靈,看時看日跟tòe行;但是,做一名基督徒,心卻是自由ê,只要mài做pháiⁿ事,上帝所應允ê日子,日日是好日。(譯自「台灣教會公報」第2815期ê「人物測寫」)