《當上帝開嘴講台語》

 | | | 轉寄

5.3 資料ê統計kap分析(5.3.1 語感測驗-1)

作者 梁淑慧 2008.11.16

研究者將所有ê問卷資料輸入Excel kap SPSS統計軟體來進行分析。按照問卷ê內容分做「語感測驗」kap「閱讀測驗」兩個部分來討論。

5.3.1 語感測驗

Chit一部分koh分做語詞、語法、語音、信息傳達四大類題目，語詞有22題；語法有15題；語音有9題；信息傳達有5題。將每一位受訪者按照個人語感所提供ê答案分析做「kap《巴克禮譯本》kāng款」（以下簡寫做「＝PKL」）以及「kap《巴克禮譯本》無kāng款」（以下簡寫為「≠PKL」）。若是kāng一道題目受訪者以複選ê方式作答，表示對兩種說法lóng會tàng接受，to̍h tī「＝PKL」kap「≠PKL」兩邊lóng畫記。

就問卷題目中ê「語詞」kap「語法」來講，「紅皮聖經」kap《現代台語譯本》ê差異無大，lóng有符合現代大多數人ê台語語感，所以「詞彙」kap「語法」二大類題若受訪者所選擇ê答案是出tùi「紅皮聖經」抑是《現代台語譯本》，to̍h是「≠PKL」。「語音」上，《現代台語譯本》kap《巴克禮譯本》大概相仝，lóng是泉州音成分khah chē，所以若受訪者選擇ê答案是出tùi《現代台語譯本》kap《巴克禮譯本》，to̍h是「＝PKL」；若受訪者選擇ê答案是出tùi「紅皮聖經」，to̍h是「≠PKL」。「信息傳達」方面，三種譯本風格有khah大ê差異，所以題目中ê三個選項to̍h分別代表三種譯本，受訪者所選擇ê是他認為khah親切好了解、khah會tàng融入本土文化ê譯文。

咱將結果整理如下：

表5.3.1 語感測驗答案統計表

社會人士組平均答題數（占該題型百分比） 大學生組平均答題數（占該題型百分比）
語詞（22題）
≠PKL 19.2（87.3﹪）21.2（96.4﹪）
＝PKL 5.8（26.4﹪） 1.6 （7.3﹪）
【百分比差距】【60.9 ﹪】 【89.1﹪】
語法（15題）
≠PKL 12.1（50.4﹪）12.8（53.3﹪）
＝PKL 3.6（24.0﹪）2.7（11.3﹪）
【百分比差距】【26.4 ﹪】 【42.0 ﹪】
語音（9題）
≠PKL 5.1（56.7﹪） 7.1（78.9﹪）
＝PKL 4.1（45.6﹪） 1.9（21.1﹪）
【百分比差距】【 11.1 ﹪】 【67.8 ﹪】
信息傳達（5題）
＝PKL 0.9（18.0﹪） 0.3（6.0﹪）
＝紅皮聖經2.3（46.0﹪） 2.6（52.0﹪）
＝現代台語譯本 2.0（40.0﹪）2.2（44.0﹪）


咱看tio̍h tī chit四類型題目頂面，受訪者選擇「≠PKL」lóng比選擇「＝PKL」chē，tùi chia會用得看出《巴克禮譯本》ê台語的確kap現代人所使用ê台語有足明顯ê差距。

Tī各類題型選擇「≠PKL」kap選擇「＝PKL」ê差距上，「語詞」ê差異siōng大，社會人士組有60.9﹪ê差距，大學生組有89.1﹪ê差距，可見《巴克禮譯本》ê語言現象siōng hō͘人明顯感受tio̍h kap現代台語有距離ê是「語詞」。「語法」題型中，選擇「≠PKL」kap選擇「＝PKL」ê差距，社會人士組有26.4﹪，大學生組有42.0﹪。「語音」題型中，選擇「≠PKL」kap選擇「＝PKL」ê差距，社會人士組有11.1﹪，大學生組有67.8﹪。

Tī「信息傳達」題型中，認為《巴克禮譯本》ê譯文khah親切好了解、khah本土化ê社會人士有18﹪，大學生有6﹪；認為「紅皮聖經」ê譯文khah親切好了解、khah本土化ê社會人士有46﹪，大學生有52﹪；認為《現代台語譯本》ê譯文khah親切好了解、khah本土化ê社會人士有40﹪，大學生有44﹪。所以chit三個譯本tī親和力kap本土化ê比較上，是「紅皮聖經」khah好《現代台語譯本》khah好《巴克禮譯本》。