《台灣之愛:盧俊義牧會筆記》

| | | 轉寄

大家來手牽手 牽出子孫ê希望

一九八九年八月廿三日,位於波羅地海ê愛沙尼亞(Estonia)、立陶宛(Lithuania)、拉脫維亞(Latvia)等三國發起一項運動,就是beh紀念in ê國家淪陷tī蘇聯統治之下五十週年,呼籲全國人民出來手牽手,將各自國家ê首府圍起來。in將chit項牽手活動號做「人鍊」(Human Chain)運動。chit項活動得tio̍h三國絕大多數國民ê支持,tī當日約定好ê時間,大家一出家門就手牽手行óa聚集tī各自首府ê周圍。蘇聯統治者原本beh派出軍隊鎮壓,m̄-koh看tio̍h chiah-nih chē ê人民,特別是其中有真chē老人、gín-á、婦jîn-lâng,無一個士兵敢出手,有kóa指揮官看tio̍h這情景,iáu-koh讚歎著chiah-ê國家人民ê勇氣。

三國首府se̍h一lìn距離總共五九○公里,有chē到二百萬ê人民手牽手,in teh唱各自ê國歌,也teh唱真chē過去bat被禁唱過ê民謠歌曲,無論是老人、gín-á ah是婦jîn-lâng,大家響聲合齊唱歌,mā出力大聲叫喝講︰阮愛阮ê國家,阮ài成做有尊嚴ê人,阮boài共產黨統治﹗

請注意上尾後一句話︰「阮boài共產黨統治﹗」這是tī一九八九年八月,hit時chūn ê蘇聯iáu是ē-tàng隨時出兵鎮壓違抗伊、無順服伊ê任何族群,ah是聯邦成員。m̄-thang認為這三個國家有siáⁿ-mih特別力量,無﹗真chē人稱in是「波羅地海三小國」,因為這三國加起來人口總數比咱一個台灣國ê一半koh khah少,國民所得kap咱比--起來差一大koe̍h;愛沙尼亞人口只有一六五萬,國民所得是六千五百美金;立陶宛人口三九○萬,國民所得是四千二百三十美金;拉脫維亞人口mā kan-tāⁿ二八○萬,國民所得是四千八百十箍美金。咱人口有二千三百外萬,國民所得超過一萬三千美金,土地面積雖然並無比in加起來ê大,m̄-koh咱無論tī tó一方面都比in ê條件好真chē。koh khah免講,in ê國家lóng kap蘇聯相連,koh蘇聯紅軍就有營區tī in ê國內。換句話講,in根本就無家己ê軍隊,所有軍隊lóng是直接聽蘇聯國防部ê命令。m̄-koh in ê人民就是有「堅固ê龍骨」,khiā tit真chāi,表現出相當堅強ê意志力。結果in成功ah﹗

兩年後,也就是一九九一年,這三國ê人民koh做一項重要ê決定,就是beh進行一項「公民投票」。換句話講,in beh用「公民投票」向全世界ê人民宣告︰阮三個國家ê人民,有權利決定家己國家ê定位kap前途。雖然蘇聯對in提出嚴厲警告,再三放話並恐嚇beh派兵掠人,甚至會動用槍kap大砲。m̄-koh這三國人民胸坎kek厚厚,並決定為tio̍h beh hō͘後代子孫活了有尊嚴,不管蘇聯統治當局beh怎樣處置in,in iáu是beh進行「公民投票」,結果超過百分之九十以上ê人民講「Beh獨立」。請注意,in表達ê意願是「獨立」,是非常清楚koh堅定kā全世界ê人講︰「阮beh獨立﹗」

咱若掀開當時歐美ê新聞報紙,就會看tio̍h當時連美國mā仝款,對一九八九年ê「人鍊」,美國政府講he是in表達「無仝方式ê紀念」活動。而當一九九一年進行公民投票時,美國mā kan-tāⁿ講ē-tàng「理解」、「尊重」,kap「關切」,並無用明確講出「贊成」、「支持」chit種ê句逗kap語詞。 看波羅地海三國人民ê氣魄,思考咱家己ê處景,真無簡單如今chiah有chit-ê機會大家ē-tàng用手牽手ê方式,beh將台灣西海岸連結起來,就是beh hō͘咱對中國明白表示︰khiā起tī台灣chia ê人民是一個有尊嚴ê族群,阮是一個獨立自主ê國家。咱甚至應該ài大聲喉叫,叫講︰台灣就是一個新koh獨立ê國家﹗

今年二月廿八日,無論是啥人發起chit項「手牽手 護台灣」ê運動,這就是一個歷史ê tńg-oat點,會tàng hō͘全世界lóng知影咱ê生命是kap chit塊土地ân-ân相牽連,並向全世界所有ê人講︰「阮就是一個國家,請尊重阮﹗」這mā beh hō͘中國共產黨政府知,咱是有國格ê國家,mā有自由表達意願ê人民﹗我深信只要咱用生命ê力量守護台灣chit塊土地,展現咱chit種堅定ê意志kap態度,án-ne一定會得tio̍h國際社會ê肯定kap尊重。身為一個傳道人ê我,必須負起chit項「護國固土」ê任務,為著我愛chit塊土地kap愛chia所有ê人民。(原文刊tī自由時報2004年2月22日第15頁)

盧俊義牧師的個人網站。