Hái-khiā-á, lí teh hō͘ lâng hoa̍t-khiā sī--bò͘? 海徛á，你teh hō͘人罰khiā是--無? Ná-ē siang-kha khiā-chê-chê, lóng m̄-káⁿ kóng-ōe ? Ná會雙腳khiā齊齊，lóng m̄敢講話 M̄-sī--lah ! M̄-sī--lah ! M̄是--lah ! M̄是--lah ! Gún a-bú ū kau-tài, ài khiā-tiàm-chia tán-thāi, 阮阿母有交代，ài khiā tiàm chia等待， Thèng-hāu hî hê nā chhut-hiān, Thèng候魚蝦nā出現 Chi̍t-tǹg chheⁿ-chhau to̍h piān-piān. 一頓chheⁿ-chhau to̍h便便 註解：Hái-khiā-á(海徛á）;蒼鷺（chhong-lō͘）; Gray Heron. Hái-khiā-á生活tī海邊á，時常用一支腳khiā--leh，另外一支kiu tī腹肚下，所以叫hái-khiā-á(海徛á）。伊會kā頷頸kiu成z字形到肩胛頭，而且用靈敏ê眼力，等待獵物。 Hái-khiā-á是鷺鳥中上大型--ê，嘴pe kap腳特別長，tī海邊tòe潮流漲退改變活動地點，滿潮時搬徙到溼地埤窟有水ê所在活動。 每年10--月飛來台灣，隔轉年4月才飛轉去北方生湠，主要食細尾魚、蟹類、水蛙類抑是蟲thōa。
|
|
|
轉寄