《台語kah魔術》

 | | | 轉寄

0501勞動節

作者 蘇晏德 2024.04.28

勞動節(台語文)
Lô-tōng-cheh

五月初一勞動節
Gō͘-goe̍h chhe-it Lô-tōng-cheh
勞工辛苦無怨慼
Lô-kang sin-khó͘ bô oàn-chheh
上山落海拚經濟
Chiūⁿ-soaⁿ lo̍h-hái piàⁿ keng-chè
日日經營為著家
Ji̍t-ji̍t keng-êng ūi-tio̍h ke

經濟起飛靠勞工
Keng-chè khí-poe khò lô-kang
感謝勞工鬥相共
Kám-siā lô-kang tàu-sio-kāng
起造幸福的美夢
Khí-chō hēng-hok ê bí-bāng
台灣快樂來出帆
Tâi-oân khoài-lo̍k lâi chhut-phâng

勞工國家的資產
Lô-kang kok-ka ê chu-sán
辛苦付出無怨嘆
Sin-khó͘ hù-chhut bô oàn-thàn
國家修法定專案
Kok-ka siu-hoat tēng choan-àn
法律健全保平安
Hoat-lu̍t kiān-choân pó pêng-an

勞動條件愛週全
Lô-tōng tiâu-kiāⁿ ài chiu-choân
大眾勞工的心願
Tāi-chiòng lô-kang ê sim-goān
逐工辛苦無平凡
Ta̍k-kang sin-khó͘ bô pêng-hoân
日夜拍拚為台灣
Ji̍t-iā phah-piàⁿ ūi Tâi-oân