《宋澤萊新著《天路拾穗》台譯版》

 | | | 轉寄

第二部：聖靈灌AK_主題14：神奇ê方言（靈語）祈禱醫病記

作者 宋澤萊 2026.06.07




第二部 聖靈灌ak


主題14：神奇ê方言（靈語）祈禱醫病記

方言（靈語）是一種神祕ê語言，是上主先賜hō͘人一種特殊ê口才，了後chiah講出ê話語。它是人kah上主之間交流ê語言，講ê人無一定ētàng完全理解伊本人所講ê語言意思，m̄koh上主卻thang理解，內面大部分lóng是對上主ê oló kah敬拜。

K已經有真chē年無做連續半工á是一工ê方言祈禱à。

Chit chūn’á，身軀ê疼痛teh kā伊困擾……。

一禮拜前，K雄雄想tio̍h應該重新做寡方言祈禱。

就ánne tī中晝，K行出門，去附近ê鹿港鎮立運動場行行leh，siōng尾chhōe tio̍h路邊ê一間全家便利店，伊tī亭á腳ê一張小玻璃桌前坐落來，kā美國方言祈禱家甘堅信（Kenneth E. Hagin ）ê一本冊《方言》phah開，ná看冊，ná做方言祈禱。因為方言祈禱無需要用tio̍h大腦思考，只是一種單純ê口頭祈禱動作，所以ētàng teh看冊ê時mā作方言祈禱，甚至做真chē家事ê時，lóng thang來配合做方言祈禱，實在是真方便ê一種祈禱。伊chit pái特別kā祈禱動作壓kē tī橫隔膜以下，也to̍h是使用一般人所講ê「腹式呼吸法」，開始做祈禱。

因為chitê運動場區，出入便利店ê人無chē，伊坐tī hia，無人干涉攪擾，方言講kah真liúlia̍h，ná親像一个外國ê新聞放送頭，直直講出相連sòa ê話語，語言變成一種優美ê樂音，tī伊ê嘴裡teh響動，震動伊ê身驅，帶來kui个身軀內部ê tháu放，不知不覺發見伊看了50頁ê冊，已經祈禱一點鐘。Chit時伊mā發見，頷頸kah kha脊phiaⁿ ê痛（he是因為看siuⁿ chē ê電視kah使用電腦phah字所帶來ê疼痛）減輕真chē，甚至手股頭kah大腿ê痠痛lóng phah m̄見去。伊感覺非常神奇！

一个魔鬼ê聲音kahná teh khau洗伊講：「方言祈禱是無法度醫病ê，你疼痛ê減輕kah方言祈禱無關係，he只是因為你今á日睏khah飽、精神好ê緣故！」

K聽魔鬼ê聲音，感覺真無歡喜，to̍h對牠講：「朋友，你講tio̍h一半，無m̄ tio̍h，我今á日是睏比較khah 飽，m̄koh iáu bē致到減輕我身軀ê疼痛；因為tútú我iáu未作方言祈禱ê時，身軀iáu是疼痛ê。正確ê原因是chitmá做祈禱，身軀chiah感覺比較khah bē痛！」

魔鬼ê聲音koh講：「我m̄相信！」

K笑起來，講：「好，ánne我to̍h koh做一點鐘ê方言祈禱！這是甘堅信先生教我ê。」

K 就ánne就近桌á，koh做一點鐘ê方言祈禱，感覺koh khah輕鬆，痛koh減kē真chē。

魔鬼koh講：「雖然是減輕，你iáu是ētàng感覺身軀ê痛kám m̄是？kiámchhái是暫時ê而已。」

K聽了koh笑起來，to̍h講：「你既然ánne講，我to̍h koh再繼續做方言祈禱。」

K就ánne kā冊合起來，離開桌á，tī運動場ê步道行行koh坐坐leh，繼續方言祈禱。

伊ê祈禱koh khah liúlia̍h，ná親像一種水chhiâng ê聲音，震動伊ê kui身軀，拚空身軀，hō͘它kahná失去身軀，腹肚kahná變成teh做大水，無停向頂koân湧起lí，大水裡有耶穌kah聖靈ê形影。伊感覺耶穌kah聖靈to̍h tī伊ê內面，kah伊同在。

不知不覺，日落西山，伊竟然tahtah koh祈禱三點鍾，精神koh khah旺。

了後，伊連續祈禱三工，所有ê疼痛lóng phah m̄見去，身軀勇壯起來，感覺牽纏tī身chiūⁿ ê魔鬼lóng消失，身心空前ê tháu放！

昨hng，有一个教會khà電話hō͘ K，叫K去參加in禮拜四ê小組聚會，伊歡喜答應。

這是一个有八个人ê細細聚會，內面有一个小姐精神體力無好，講是最近有真chē hō͘她感覺緊張、bē爽快ê tāichì發生。

Tī聚會後，K kā她講一个腹式呼吸ê方言祈禱秘訣，K講：「先長長吸一口氣，先mài祈禱；了後慢慢á吐氣，一面吐氣一面祈禱，一直kā氣吐完，方言祈禱詞mā暫時講soah。了後koh再吸一口氣，先mài祈禱；了後慢慢á吐氣，一面吐氣一面祈禱，一直kā氣吐完，方言祈禱詞暫時mā講soah……ánne反覆做loeh。精神體力to̍h ē漸漸變好！」

──2021、03、26 tī鹿港