《耶穌言行錄》

| | | 轉寄

Tē-61-chiuⁿ,Chhut-sì chiū chhiⁿ-mî,An-hioh-ji̍t tit-tio̍h kng

listen

(Iok-hān 9:1-41)
Ū chi̍t ji̍t,Iâ-so͘ chhut tī koe—lō͘ nit,tú-tio̍h chi̍t ê khit-chia̍h chhut-sì chiū chhiⁿ-mî.Iâ-so͘ lîn-bín i,chiū phùi-nōa chhiau thô͘ kô͘ i ê ba̍k-chiu,kah i khì Se-lô-a ê tî sóe.Hit ê lâng khì sóe,tò-tńg-lâi ba̍k-chiu liâm-piⁿ kng.Chhù-piⁿ ê lâng khòaⁿ-kìⁿ i ê ba̍k-chiu kng,put-chí kî-koài,ū lâng kóng,"Chit ê lâng kiám m̄-sī tī lō͘-piⁿ chòe khit-chia̍h mah?"Ū lâng kóng,"Tio̍h,"ū lâng kóng,"I ê bin chhin-chhiūⁿ.Chhiⁿ-mî lâng jīn kóng,"Góa chiū-sī. "Lâng mn̄g i kóng,"Lí ê ba̍k-chiu cháiⁿ-iūⁿ ōe kng?"Chhiⁿ-mî ê lâng ìn kóng,"Ū miâ Iâ-so͘—ê,ēng nōa chhiau thô͘ kô͘ góa ê ba̍k-chiu,kah góa khì sóe tī Se-lô-a ê tî;khì sóe chiū kng. "Chèng-lâng kóng,"Hit ê lâng tī tah-lo̍h?"I ìn kóng,"Góa m̄-chai. "Chèng-lâng chiū chhōa i khì Hoat-lī-sài lâng ê só͘-chāi.Hit ji̍t sī an-hioh-ji̍t.

Hoat-lī-sài lâng mn̄g,"Ba̍k-chiu cháiⁿ-iūⁿ ōe kng?" I ìn kóng,"I ēng thô͘ kô͘ góa ê ba̍k-chiu,góa sóe chiū kng. "Ū lâng kóng,"I bô siú an-hioh-ji̍t,m̄-sī tùi Siōng-tè tau chhut. "Ū-ê kóng,"Ū chōe ê lâng beh thái ōe kiâⁿ chit hō ê sîn-jiah?"Koh mn̄g kóng,"Í-keng hō͘ lí ê ba̍k-chiu kng,lí phah-sǹg sī sím-mi̍h hō ê lâng?"Ìn kóng,"Sī sian-ti lâng. "

Iû-thài lâng m̄ sìn i chhiⁿ-mî ōe koh kng,chiū kiò I ê pē-bú lâi mn̄g kóng,"Lín kóng lín ê kiáⁿ chhut-sì chiū chhiⁿ-mî,kiám sī chit lâng mah?Taⁿ cháiⁿ-iūⁿ ōe kng?"I ê pē-bú kóng,"Goán chit ê kiáⁿ chhut-sì chiū chhiⁿ-mî,goán chai,taⁿ cháiⁿ-iūⁿ i ê ba̍k-chiu kng,goán m̄-chai,chī-chūi-á hō͘ i ê ba̍k-chiu kng,goán iā m̄-chai;i í-keng tōa-hàn,thang mn̄g i. "Hoat-lī-sài lâng koh-chài kiò chit ê lâng kóng,"Tio̍h chiong êng-kng kui hō͘ Siōng-tè,goán chai chit ê lâng sī ū chōe ê lâng. "Pêng-sò͘ chhiⁿ-mî ê lâng ìn kóng,"I sī ū chōe ê á bô,góa m̄-chai;chá góa chhiⁿ-mî,taⁿ ba̍k-chiu kng,góa chai. "Koh mn̄g kong,"I sī cháiⁿ-iūⁿ chòe?"Ìn kóng,"Góa í-keng kā lín kóng,lín m̄-thiaⁿ,siáⁿ-sū ài koh-chài mn̄g?Kiám sī ài beh chòe I ê ha̍k-seng mah?"Chèng-lâng mē i kóng,"Lí sī I ê ha̍k-seng,goán sī Mô͘-se ê ha̍k-seng.Siōng-tè hoan-hù Mô͘-se sī goán só͘ chai,to̍k-to̍k chit ê lâng goán m̄-chai tùi tah-lo̍h lâi.
"Ìn kóng,"I hō͘ góa ê ba̍k-chiu kng,lín ia̍h m̄-chai I tùi tah-lo̍h lâi,kiám m̄-sī kî-koài mah?Tùi kó͘-chá kàu taⁿ bē-bat thiaⁿ-kìⁿ chhut-sì chiū chhiⁿ-mî ê ba̍k-chiu,lâng ōe hō͘ i kng.Chit hō ê lâng,nā m̄-sī tùi Siōng-tè chhut,chiū bōe-ōe án-ni chòe. "Chèng-lâng siū-khì,kek i chhut.Iâ-so͘ thiaⁿ-kiⁿ i hō͘ lâng kek chhut,khì tú-tio̍h i chiū kóng,"Lí sìn Siōng-tè ê Kiáⁿ mah?"Ìn kóng,"Chú ah,I sī chī-chūi hō͘ góa sìn I?"Iâ-so͘ kóng,"Kap lí kóng ê lâng chiū-sī. "Ìn kóng,"Chú ah,góa sin;"chiū pài I .

Lâng chhut-sì chiū chhiⁿ-mî chin-chiàⁿ sī khó-sioh.Iáu ū chi̍t hāng pí chhut-sì chhiⁿ-mî koh-khah siong-tiōng,chiū-sī sim o͘-àm,m̄-chai chōe,bōe hiáu-tit jīn Iâ-so͘ chòe Kiù-chú.

Lán tio̍h kiû Siōng-tè khui lán ê sim-ba̍k,hō͘ lán ê o͘-àm pìⁿ chòe kng,chiah ōe bêng-pe̍k Siōng-tè ê chí-ì,kiâⁿ I só͘ hoaⁿ-hí ê tāi-chì,kui êng-kng tī Siōng-tè,lō͘-bé hióng-siū éng-oán ê hok-khì.

思羅安台語點字網站