《耶穌言行錄》

Tē-38-chiuⁿ,Thiaⁿ tō-lí ê koan-hē

作者 Ko Kim-seng.

listen

(Má-thai 11:20-28；Lō͘-ka 10:10-22)
Îa-so͘ tī Ko-li̍ap-sìn，Pek-sài-tāi，Ka-pek-lông ta̍uh-ta̍uh kóng tō-lí，kîaⁿ sîn-jiah；kàu bé lâng bô hóan-hóe，Îa-so͘ chīu chek-pī kóng in ū chai-ē，i̍ah sím-phòaⁿ ê ji̍t in ê hêng-ho̍at pí Chhui-lô Se-tùn，Só͘-to-má tngg koh-khah bōe khí.

Lán khòaⁿ Îa-so͘ chek-pī chí kúi-nā ê sîaⁿ，ū thang chòe lán ê kàm-kài，chīu-sī lán ū ki-hōe thang thiaⁿ tō-lí，i̍ah ū Sèng-chheh thang láng-kìu，làu-gi̍ah thang chai Îa-so͘ chin-chìaⁿ sī Kìu-chú；lán nā li̍ah chit ê tāi-chì chòe bô ìau-kín，lán ê koan-hē pí chōe-chōe bē sīu tō-lí ê lâng khah tōa；chhin-chhīuⁿ Îa-so͘ ū kóng，"Hōan-nā chōe-chōe hō͘ i，tek-khak tùi i thó chōe-chōe. "

Îa-so͘ ū siat-li̍p chhit-cha̍p lâng，hō͘ in khì thôan tō-lí；hia ê lang5to2-lâi，sin put-chí joaⁿ-hí hê-hok Îa-so͘，kóng，"Chú ah，óa-khò lí ê mîa，kúi i̍ah hâng-ho̍k góan. "Îa-so͘ kóng，"Bo̍h-tit in-ūi án-ni lâi hoaⁿ-hí，ti̍oh li̍ah lín ê mîa lì tī thiⁿ-nih chòe hoaⁿ-hí. "Îa-so͘ án-ni kà-sī，hō͘ lán chai tē-it thang hoaⁿ-hí ê tāi-chì，chīu-sī hō͘ Sīong-tè kì lán ê mîa tī o̍ah-mīa ê chheh.

Hit-sî Îa-so͘ sim-lāi hoaⁿ-hí kóng，"Pē ah，thiⁿ-tōe ê Chú，góa o-ló Lí；in-ūi Lí chiong chit ê tō-lí tùi ū tì-hūi，ū châi-lêng ê lâng khǹg-ba̍t；nā-sī tùi sòe-kíaⁿ chīu hían-bêng；si̍t-chāi ah，Pē lí hó ê ì-sù chin-chìaⁿ án-ni. "Chit só͘-chāi só͘ kì-chài sī lán ê Chú Îa-so͘ sīuⁿ kàu Sīong-tè chàiu ka-kī hó ê ì-sù khóan-thāi lâng，lâi thòe sīu-un ê lâng chhíⁿ-gō͘，m̄-thang óa-khò ka-kī ê tì-sek；ti̍oh khiam-pi chin-chhīuⁿ sòe-hàn ê gín-ná，chiah thang ǹg-bāng Sīong-tè ê un-tían，chhin-chhiuⁿ Si-phian kóng，"Un-jîu ê lâng tek-khak ēng gī chhōa i，ēng tō-lí kà-sī i. "

思羅安台語點字網站